എം.എസ്. ഗോപാലകൃഷ്ണൻ

ഇംഗ്ലീഷ് വിലാസം

https://ml.wikipedia.org/wiki/M._S._Gopalakrishnan

എം.എസ്. ഗോപാലകൃഷ്ണൻ
എം.എസ്. ഗോപാലകൃഷ്ണൻ
ജനനം	മൈലാപ്പൂർ സുന്ദരയ്യർ ഗോപാലകൃഷ്ണൻ 1931 ജൂൺ 10 മൈലാപ്പൂർ, മദ്രാസ്, മദ്രാസ് പ്രവിശ്യ, ബ്രിട്ടീഷ് ഇന്ത്യ
മരണം	ജനുവരി 3, 2013(2013-01-03) (പ്രായം 81) ചെന്നൈ, തമിഴ്നാട്, ഇന്ത്യ
ദേശീയത	ഇന്ത്യ
അറിയപ്പെടുന്നത്	വയലിൻ വിദ്വാൻ

ഭാരതത്തിലെ പ്രശസ്തനായ വയലിൻ വിദ്വാനായിരുന്നു മൈലാപ്പൂർ സുന്ദരയ്യർ ഗോപാലകൃഷ്ണൻ എന്ന എം.എസ് ഗോപാലകൃഷ്ണൻ(10 ജൂൺ 1931 – 3 ജനുവരി 2013). കർണ്ണാടക - ഹിന്ദുസ്ഥാനി ശൈലികളിൽ ഒരുപോലെ വൈദഗ്ദ്ധ്യം നേടിയ ആളായിരുന്നു അദ്ദേഹം. ലാൽഗുഡി ജയരാമൻ,​ ടി.എൻ. കൃഷ്ണൻ,​ എം.എസ്. ഗോപാലകൃഷ്ണൻ എന്നിവർ 'വയലിൻ ത്രയങ്ങൾ' എന്ന് അറിയപ്പെട്ടിരുന്നു.

ജീവിതരേഖ

1931 ജൂൺ 10-ന് ചെന്നൈക്കടുത്ത് മൈലാപ്പൂരിൽ ജനനം. തിരുവനന്തപുരം രാജകൊട്ടാരത്തിലെ വയലിൻ വാദകനായിരുന്ന പറവൂർ പി. സുന്ദരയ്യരായിരുന്നു പിതാവ്. പ്രശസ്ത വയലിനിസ്റ്റ് എം.എസ്. അനന്തരാമൻ അദ്ദേഹത്തിന്റെ ജ്യേഷ്ഠനായിരുന്നു. എട്ടാം വയസ്സിൽ അച്ഛനോടൊപ്പമായിരുന്നു അരങ്ങേറ്റം. വയലിൻവാദ്യരംഗത്ത് നിരന്തരം പരീക്ഷണങ്ങൾക്ക് തയ്യാറായ ഗോപാലകൃഷ്ണന്റെ വയലിനിലെ പറവൂർശൈലി അദ്ദേഹത്തിന് സംഗീതലോകത്ത് ഏറെ ആരാധകരെ നേടിക്കൊടുത്തു.ഡി.വി. പലുസ്കർ, ഓംകാർനാഥ് ഠാകൂർ തുടങ്ങി നിരവധി പ്രഗല്ഭരുമായി പങ്കുചേർന്ന് ഗോപാലകൃഷ്ണൻ സംഗീതപരിപാടികൾ നടത്തിയിട്ടുണ്ട്.വിദേശത്തും അനേകം പരിപാടികൾ അദ്ദേഹം അവതരിപ്പിച്ചിട്ടുണ്ട്.

മീനാക്ഷിയാണ് ഭാര്യ. വയലിൻ വാദകരായ എം. നർമദ, സുരേഷ്, ലത എന്നിവരാണ് മക്കൾ. 2012-ൽ പത്മഭൂഷൺ നേടിയ അദ്ദേഹം തൊട്ടടുത്ത വർഷം ജനുവരി 3-ന് തന്റെ 82-ആം വയസ്സിൽ വാർദ്ധക്യസഹജമായ അസുഖങ്ങളെത്തുടർന്ന് ചെന്നൈയിലെ ഒരു സ്വകാര്യ ആശുപത്രിയിൽ വച്ച് അന്തരിച്ചു.

പുരസ്കാരങ്ങൾ

• പത്മഭൂഷൺ (2012)
• പത്മശ്രീ (1975)
• ടാഗോർ രത്‌ന അവാർഡ്
• സംഗീതനാടക അക്കാദമി പുരസ്‌കാരം (1982)
• കേരള സംഗീത നാടക അക്കാദമി പുരസ്‌കാരം (1979)
• സംഗീത കലാനിധി പുരസ്‌കാരം (1998)
• കേരള സംഗീതനാടക അക്കാദമി ഫെലോഷിപ്പ് 2007.